Joseba Legarrari elkarrizketa

Joseba Legarra, lehendakari berria

1- Joseba Legarra Erasun. Doneztebarra. 29 urte. Nolatan Erreka Kirol Elkarteko lehendakaria?

 Ba ez dakit, Errekaren barrenin nere bizitzan egin duten ibilbidearen bertze pauso bat dela erranen nuke. Ttiki ttikitatik Errekak antolatzen dituen ekintzetan parte hartzen hasten zara, herriko krosa, mendi bueltak, pilota, eskubaloia… gero, pixkot heldutzean, laguntzen ere hasten zara, talderen bateko entrenatzaileari laguntzen edo eguberritako saskia osatzen adibidez. Behin dinamika horretan sartuta, ahal duzun guzia egiten duzu momentuko zuzendaritza taldeari behar den gauza guztietan laguntzeko eta azkenik zuzendaritza talde berri bat osatzeko proposamena egiten dizute.

2- Erran beharrik ez dago, ez zaudela bakarrik. Aurkeztu nor izanen diren  zure Zuzendaritza Batzordeko lagunak...

 Lauko talde bat osatu dugu. Txibi Uterga, Koldo Lagarra eta Paxkual Bertiz izanen dira nirekin batera zuzendaritzan egonen direnak.

Txibi lehendakari ordea izanen da, Koldo diruzaina eta Paxkual berriz idazkaria. Hala ere, erran beharra dago, lanak ez direla sobera personalizatuak egonen eta dena denon artean egiten saiatuko garela, bakoitzaren kargu konkretuari kasu haundirik egin gabe.

Hiru hauek ere, nire gisa, gazte gaztetatik Errekaren munduan sartuak egon dira, parte hartzen, edozein gauzetan laguntzeko prest, Errekarengatik gauzak ahalik eta hobekien egiteko gogoz… Beraz talde polita osatu dugula uste dut, denborak erranen digu.

3- Komisioak ere antolatu dira, lanak ahalik eta gehin banatzeko: eskubaloia, Eguberriko Saskia, Herri Krossa + San Silvestrea, Komunikazioa. Eta sekzio ezberdinetako bokalak... Lan talde polita elkartu da hemen ere, ezta?

 Bai hala da, eta hori guretzako laguntza ikaragarria da. Horregatik, aurreko zuzendaritza taldeak, azken 10 urte hauetan egin duen lan bikaina goraipatu nahiko nuke. Jarduera guztietan laguntzaileak zituzten arren eta jendea, gu erraterako, laguntzera hurbiltzen zitzaien arren, lanaren zama guztia haiek eramaten zuten, eta nola gainera. ZORIONAK!

Hagitz lan talde polita osatu da bai, bakoitza bere alorrean buru belarri lanean, eta denak gainera ilusioz eta Erreka geroz eta haundiagoa egiteko asmoarekin.

4- Ze ideak dituzue? Zein da zuen helburua?

 Gure helbururik garrantzitsuena orain arte egindakoa mantetentzea da eta hortik aurrera hobetzen ahal bada hobetzea. Egia da gauza berriak egitea beharrezkoa izaten dela eta idei batzuk ere baditugu, baina hori oraindik sekretuan gorde nahiko genuke.

5- Nola ikusten duzu Kirol Elkartearen gaur egungoa? Osasuntsu dago Elkartea?

Ongi ikusten dut eta arrunt osasuntsu gainera. Horren adierazle argiena jendeak lanerako duen gogoa da. Ez nuke hau erranen zuzendaritza batzordea bakarrik ikusiko banuke, edo lan taldeak osatzeko jendea ezin bilatuz ibiliko bagina, edo antolatzen diren ekintzetan jendeak ez balu parte hartuko… Ikusi bertzerik ez da egin behar Elkartearen sekzio desberdinetan zenbat ume, gazte eta ez hain gazte dagoen sartuta eta antolatzen diren jardueretan (krosa, san silvestrea, mendiaren eguna…) zenbat jende etortzen den, bai laguntzera, ikustera edo parte hartzera.

  

6- Eta etorkizunari begira... baikor zara?

 Baikor naiz bai, gaur egungo egoera ikusita zer erranen dut ba. Eskubaloian zenbat neska eta mutiko talde, pilotariak, korrikalariak, triatletak, mendigoizaleak… denetik daukagu eta jendeak, bai herrikoak eta baita ingurukoak ere, kirola egiteko gogoa duen bitartean,  hortxe egonen gara ahal dugun guztian laguntzeko, antolatzeko, bideratzeko…

 Beraz jendeak kirola egiten duen bitartean hor egonen da ERREKA!