ASTEARTEA - MARTES ( DONEZTEBE)

20:30 ERREKA - IRUÑA ESKUBALOIA

martes, 18 de junio de 2019

BESTETAKO ALDIZKARIKO ARTIKULUA

Doneztebeko saltokiak ederki apainduta Klubaren koloreekin. Balkoiak taldearen kamisetekin. Herrian bi hitz nagusi: Erreka eta eskubaloia. Ilusioa ezin handiagoa zen eta denboraldi bikaina osatu eta gero, Liga txapelketa lortzeko Lauko Finala etxean jokatzen zen.

 Larunbatean kiroldegia beteta zegoen partidua jokatu baino ordubete lehenago. Asko sufritu eta gero, eta zaletuen animoen ezinbesteko laguntzarekin, Cantolagua taldeari 25-22 irabaztea lortu genuen eta final handirako sailkatu ginen.

 Igandea ailegatu zen. Loyola zen finaleko aurkaria eta sasoi betean zetozen. Norgehiagoka oso bizia ikusi genuen eta berdintasuna izan zen nagusi. Horren adibide argiena da Loyolak berdinketa lortu zuela partidua bukatzeko 30 segundoren faltan. Kolpe gogorra izan zen. Baina ez genuen amore eman eta erditik azkar batean atera genuen azkeneko erasoa ahalik eta ondoen jokatzeko.

 Proiektu hau posible egiten duten babesleek. Ilusioz beteta eta izugarrizko lana egiten duten harrobiko entrenatzaileek. Klubeko atal guztietako kirolariek. Dena aintzinera ateratzeko lan isila egiten duen Zuzendaritza Batzordekoek. Eta, nola ez, partiduko 60 minutotan etengabe animatzen ibili ziren gure zaleek, Marea Urdinak. Azken finean, errekazale GUZTI-GUZTIEK bultza egin genuen,  12 segundoren faltan, Iñigoren eskuetan zegoen baloi hori barrura sartzeko. 32-31.

 28 urte eta gero… LIGAKO TXAPELDUNAK! Kiroldegian poza lehertu zen. Besarkada aunitz. Eta zergatik ez onartu, emozioak eragindako hainbat malko. Batez ere, ametsa zena egi bilakatzeko gorputz eta arima lan egin duten pertsonek botatakoak.

 Lauko Finala eta gero, Kopa irabaztea lortu genuen, DOBLETE HISTORIKO bat lortuz. Hori gutti ez balitz, Oier Berasategi denboraldiko jokalari onena izendatu zuten eta gure zalegoa, Nafarroako hoberena. Gainera, herritik kanpo ditugun gure bi izarrek ere berri bikainak eman dizkigute: Niko Mindegiak Frantziako Kopa irabazi du Chambery taldearekin, eta Ibai Meokiri Asobal mailako nafar onenari saria eman diote Anaitasunarekin denboraldi bikaina egin ondoren.

Liga eta Kopa eskuratu eta gero, Zarautzera joan ginen Lehen Mailarako igoera fasea jokatzera. Zarautzen zegoen maila oso handia zen, baina taldeak erakutsi zuen edonoren aurka lehian aritzeko gai zela. Ez genuen igoera lortu, baina denboraldi hasieran helburu hori lortzea ez genuen planteatu ere egiten. Dena dela, herria taldearen inguruan elkartzea lortu genuen, bertze behin ere. Emozioz betetako asteburua izan zen, inoiz atzenduko ez duguna eta Errekako historiara pasako den denboraldiari urrezko brotxea jarri genion.

 Baina Errekak, eskubaloiaz gain, beste hainbat kirol ditu, eta horietan ere buru-belarri gabiltza lanean:

 Mendi Egunak kirol honetako hainbat zale biltzen ditu. Aurten Julen Errandonea izan da gonbidatu nagusia. Gainera, gure ezinbesteko ateraldiekin jarraitzen dugu: Bonozorrotz, Saioa eta Mendaur.

 Triatloi atalak, Erreka Tri, poz handiak ematen dizkigu. Maila indibidualean zenbait aldiz igo gara podiumean, baina bereziki nabarmendu nahi dugu Eguesibarren Nafarroako taldekako duatloi txapelketan azpi-txapeldun geratu ginela. Gainera, lehen aldiz, ziklismo talde bat antolatu dugu, Master kategorian.

 Donezteben pilotak erreferente izaten jarraitzen du Errekak maila handiko bi txapelketa antolatzen dituelako: Malerrekako Txapelketa eta Josetxo Ezkurra Memoriala. Esku-pilotaz gain, erremonteak ere gure klubean leku berezia du, ezin zen bertzela izan gurea bezalako eskualde erremontezale batean.

 Noelia Ariztiak eta Oskar Mindegiak Errekako Judo eskola zuzentzen dute. Asko izan dira emaitza onak lortu dituzten judokak: 3 domin benjaminetan, 7 alebinetan eta 3 infantiletan. Baina Iban Arambelek egindako lana nabarmendu nahi dugu, bere kategoriako Nafarroako txapelduna izan da, eta, ondorioz, Valentzian jokatutako Espainiako Txapelketan parte hartu du. Bada etorkizuna!

 EKT, Errekako emakume korrikalarien taldea da, bere ibilbidea 2013an hasi zen, eta astero biltzen dira entrenatzeko. Herri Krossa eta San Silvestre  lasterketan modu aktiboan parte hartzeaz gain, taldearen egutegian Lilatoi lasterketa gorriz markatuta dute.

 Eta Erreka Dantza Taldeaz ere ez dugu atzendu nahi, baina aldizkari honetan espazio berezia du.

 Errekak antolatutako krossak 41. urteurrena betetzen du aurten eta argi dago sasoi betean mantentzen dela. Doneztebeko San Silvestre lasterketa, aldiz, gazteagoa da, baina herritarren artean ospe handia lortu du. Azken edizioan 275 lagunek parte hartu zuten eta lasterketak elkartasun keinu bat egin nahi izan zuen ADANO elkartearekin.

 Azken bi urteetan Udako Kirol Eskola berreskuratu dugu, oporretan haur eta gaztetxoen aisialdi eskaintza aberasteko helburuarekin. Horretaz gain, urtero Xabierrera egiten dugun ateraldiarekin jarraitzen dugu.

 Berrikuntza bezala, aipatu nahi dugu eskualdeko bertze hainbat kirol elkarterekin batera, haur eta gaztetxoendako ziklismo lasterketak berreskuratzeko proiektu eder batean murgilduta gaudela.

 Eta denboraldia behar bezala akitzeko, Errekaren Eguna ospatzen dugu, Klubaren urteroko besta paregabea.

 Honenbestez, agur erranen dizuegu, lanean gogor jarraituko dugula zin eginez. Hurrengo denboraldian aurten disfrutatu dugunaren erdia gozatzen badugu, asko izanen da. Bitartean San Pedro bestez ahalik eta gehien gozatu. Errekazaleek arrazoi aunitz ditugu hori egiteko. Gora Doneztebe eta Aupa Erreka!

No hay comentarios: